Psalms 69

Kumqondisi wokuhlabela. Itshuni ethi, “Amaluba.” ElikaDavida.

1Ngisindisa, O Nkulunkulu, ngokuba umsinga wamanzi usugamenxe ngentamo yami.

2Ngiyagalula ezinzikini ezitotayo, lapho okungekho ndawo yokugxila. Sengifike enzikini; izimpophoma sezingikhulela.

3Sengidiniwe ngokumemeza ngicela uncedo; umphimbo wami usuwome qha. Amehlo ami aseze efiphele, edinga uNkulunkulu wami.

4Labo abangizondayo kungelasizatho banengi okwedlula izinwele zekhanda lami; banengi abayizitha zami kungelambangela, labo abafuna ukungidiliza. Ngiyaphoqelwa ukuhlawula engingakuntshontshanga.

5Uyabazi ubuthutha bami, wena Nkulunkulu; isono sami kasifihlakalanga kuwe.

6Akuthi labo abathemba kuwe bangayangiswa ngenxa yami, O Jehova, Jehova uSomandla; akuthi labo abakudingayo, bangahlaziswa ngenxa yami, O Nkulunkulu ka-Israyeli.

7Ngiyakubhensela ukugconwa ngenxa yakho, ihlazo lihuqiwe ebusweni bami.

8Ngingowemzini kubafowethu, Ngingowemzini emadodaneni kamama;

9Ngokuba ukutshisekela indlu yakho kufuthelene kimi, lezethuko zalabo abakuthukayo ziwela kimi.

10Ngithi lapho ngilila ngizila ukudla, ngibhensele ukwetheswa inhlamba;

11kuthi lapho ngivunula amasaka abantu badlale ngami.

12Labo abalinda emasangweni bayangihleka, ngiyingoma nje yezidakwa.

13Kodwa ngikhuleka kuwe, O Jehova, ngesikhathi somusa wakho; ngothando lwakho olukhulu, O Nkulunkulu, ngiphendula ngensindiso yakho eqinisekileyo.

14Ngihlenga exhaphozini, ungangiyekeli ngigalule; ngikhulula kulabo abangizondayo, emanzini atshonayo.

15Ungayekeli izikhukhula zingigalulise loba izinziki zingiginye, loba umgodi uvaleke umlomo wawo phezu kwami.

16Ngiphendula, O Jehova, ngenxa yokulunga kothando lwakho; emuseni wakho omkhulu phendukela kimi.

17Ungayifihleli ubuso bakho inceku yakho; ngiphendula masinyane, ngoba ngiphakathi kohlupho.

18Sondela ungikhulule; ngihlenga ngenxa yezitha zami.

19Uyakwazi ukuthi ngigconwa njani, ngihlaziswa njalo ngiyangiswa; zonke izitha zami ziphambi kwakho.

20Ukugconwa sekuyephule inhliziyo yami kwangitshiya esithubeni; Ngadinga uzwelo ngaluswela, abaduduzi, kodwa ngabaswela.

21Bathela inyongo ekudleni kwami banginathisa iviniga nxa ngomile.

22Sengathi itafula abalidekelwayo lingaba ngumjibila; sengathi lingaba yisijeziso lesithiyo.

23Sengathi amehlo abo angafiphala bangaboni, bephuke amaqolo bakhokhobe nini lanini.

24Thululela ulaka lwakho phezu kwabo; akuthi ulaka lwakho olwesabekayo lubehlele.

25Sengathi indawo yabo ingaba ngamanxiwa; akungabi lamuntu ozahlala emathenteni abo.

26Ngokuba bahlupha labo obalimazayo bakhulume ngobuhlungu balabo obalimazayo.

27Bethese amacala phezu kwamacala; ungayekeli bazuze isabelo sensindiso yakho.

28Sengathi bangesulwa encwadini yokuphila bangaze babalwa kanye labalungileyo.

29Ngisebuhlungwini, ngikhathazekile; sengathi insindiso yakho, O Nkulunkulu ingangivikela.

30Ngizalidumisa ibizo likaNkulunkulu ngengoma, ngilibabaze ngokubonga.

31Lokhu kuzamthabisa uJehova okwedlula inkabi, okwedlula inkunzi yonke ilezimpondo lamangqina ayo.

32Abayanga bazabona bajabule – lina elimdingayo uNkulunkulu, sengathi izinhliziyo zenu zingaphila!

33UJehova uyabezwa abaswelayo, kabeyisi abantu bakhe abathunjiweyo.

34Akuthi izulu lomhlaba kumdumise, izilwandle lakho konke okunyakaza kuzo,

35ngokuba uNkulunkulu uzayisindisa iZiyoni ayakhe kutsha imizi yakoJuda. Yikhona-ke abantu bazakwakha khona balithathe libe ngelabo;

36abantwana bezinceku zayo lizakuba yilifa labo, labalithandayo ibizo lakhe bazahlala khona.